Archivo de la categoría: actos

I Xornadas sobre retos das administracións contemporáneas

DSC_8858“As administracións deben evolucionar ao carón da sociedade, a ser posible por diante, nun entorno crecentemente cambiante, no que a sensibilidade e as demandas da cidadanía mudan a moito maior ritmo ca no pasado”. Son palabras do presidente do Parlamento de Galicia, esta tarde, na inauguración das I Xornadas sobre retos das administracións contemporáneas, que se celebran no Centro Cultural Marcos Valcárcel, en Ourense.

Abundando nesta idea, o titular do Lexislativo galego engadiu que o principal desafío dos poderes públicos é “dar resposta ás demandas e ás necesidades da cidadanía”.

Apuntou, nesta liña, que “para estar á altura do que a xente agarda dela”, a Administración –con independencia do seu ámbito competencial-  “deberá ser transparente, deberá transmitir confianza, deberá ser accesible, facilitar a participación e  amosarse próxima aos intereses das persoas;  deberá responder con inmediatez e deberá xestionar os recursos públicos –recursos que son de todos, porque proceden dos impostos- con criterios de eficacia e de eficiencia”.

Para materializar estes obxectivos –engadou Santalices Vieira-, as tecnoloxías da información e a comunicación “convertéronse en magníficos aliados”, especialmente en ámbitos como o da transparencia, a accesibilidade, a proximidade ou a participación.

Recordou que malia non ser unha administración ao uso, o Parlamento de Galicia traballa co obxectivo de facer realidade obxectivos como os enunciados por Santalices na súa intervención e convidou aos participantes nas xornadas a coñecer a sede electrónica da Cámara, a primeira deste tipo impulsada por un parlamento autonómico en España para avanzar en materia de transparencia, participación e proximidade.

“Somos unha cámara eficaz pero, ademais, xestionamos con eficiencia os recursos económicos que a sociedade pon a nosa disposición”, afirmou o Parlamento de Galicia, que puxo como exemplo o feito de que o custe medio dun deputado no Parlamento de Galicia é xusto a metade respecto ao Parlamento Vasco, que conta tamén con 75 deputados.

Santalices comezou a súa intervención recoñecendo a “non moi boa imaxe” do colectivo de funcionarios públicos entre o conxunto da sociedade, feito que, na súa opinión, constitúe tamén un reto a superar.

Conferencia “O Parlamento de Galicia, unha institución aberta”, no auditorio do Museo Etnográfico casa do Patrón, en Doade (Lalín)

O presidente do Parlamento de Galicia, Miguel Ángel Santalices Vieira, explicou esta mañá, nunha conferencia impartina no auditorio do Museo Etnográfico Casa do Patrón, en Doade (Lalín), os diferentes mecanismos de participación cidadá impulsados pola Cámara galega, ao tempo que defendeu a aposta da institución por achegarse á xente.

01 SANTALICESO titular do Lexislativo detívose na estratexia de apertura impulsada pola Cámara e que permite á cidadanía impulsar proposicións de lei de iniciativa cidadá e proposicións non de lei, ao tempo que fai posible  a participación na elaboración das leis, no control ao goberno, ou exercer o dereito de petición. Todas estas posibilidades de participación foron reforzadas recentemente, como recordou Santalices, coa posta en marcha  da sede electrónica do Parlamento de Galicia que se converteu na primeira Cámara autonómica en ofrecer un servizo deste tipo.

Deputadas e deputados, persoas e empresas contan, deste xeito, con todos os servizos de administración electrónica dispoñibles a día de hoxe. A sede electrónica reforza, ademais, as posibilidades de participación cidadá e completa a dixitalización de procedementos como a licitación ou a factura electrónica.

Canda a participación cidadá, Santalices Vieira insistiu no seu empeño en abrir o Parlamento á xente a través de medidas como o programa de visitas guiadas á sede do lexislativo galego, as xornadas de portas abertas semanais que permiten a calquera que o desexe poda visitar o Parlamento cada luns sen necesidade de inscrición previa, o programa “Coñece as túas institucións” co que escolares de 5º e 6º de Primaria e 1º e 2º de ESO poden visitar na mesma xornada o Parlamento e  Xunta, ou ciclo de charlas divulgativas en centros educativos impartido pos exdeputados/as.

Búscase, con estas iniciativas, superar o descoñecemento que a sociedade ten respecto ao Parlamento e as competencias que este ten encomendadas.

 

Presentación do libro Xerardo Fernández Albor e o seu tempo. Cen anos dun presidente

imgs8952O presidente do Parlamento de Galicia, Miguel Ángel Santalices Vieira, subliñou esta tarde que o expresidente da Xunta Xerardo Fernández Albor exerceu a política “con paixón, pero tamén con sentidiño, desde a coherencia e co galeguismo como sinal de identidade”. Santalices expresábase así na presentación do libro Xerardo Fernández Albor e o seu tempo. Cen anos dun presidente, na que se deron cita diferentes personalidades, encabezadas polo titular da Xunta, Alberto Núñez Feijóo.

Santalices gabou o “galeguismo democrático, plural e integrador” que inspirou a acción política de Fernández Albor,  sentimento que situou “nas antípodas do nacionalismo excluínte e segregador”. Falou dun galeguismo “herdeiro das mellores correntes históricas da Galicia territorial e da Galicia universal; un galeguismo aberto ao conxunto de España e do mundo, con espírito e vocación europea, pola que tanto traballaría posteriormente D. Xerardo desde Bruxelas e Estrasburgo”.

O presidente do Parlamento felicitou aos coordinadores e impulsores da edición deste libro “ameno, de lectura doada e gratificante para as persoas interesadas na figura do Dr. Fernández Albor e a Galicia do seu tempo”. Un volume que “ademais de poñer en valor a figura do homenaxeado, nos axuda a comprender a profunda transformación rexistrada en Galicia en pouco máis de medio século”.

Para o titular do Lexislativo galego, ese avance é “consecuencia directa, en gran parte, da estabilidade e o benestar derivados da Constitución do 78 e do asentamento e consolidación da autonomía que a Carta Magna e o posterior Estatuto nos brindaron e que persoas como D. Xerardo puxeron en marcha”.

Da traxectoria persoal do homenaxeado, Santalices recordou que Fernández Albor destacou como médico humanista, como cirurxán, como xestor sanitario  e como “galego bo e xeneroso que amaba profundamente a Galicia”. Por iso, no cumio da súa carreira profesional, o Dr. Fernández Albor non dubidou en antepoñer os intereses colectivos sobre os persoais”.

Ofrenda da Translación dos Restos do Apóstolo

IMG_5148Santalices anima a “coidar e a impulsar” os avances sociais e o estado de benestar xurdido ao amparo da Constitución española que celebra o seu 40 aniversario

  • O presidente do Parlamento de Galicia exerceu como delegado rexio na tradicional Ofrenda da Translación presentada na Catedral de Santiago de Compostela
  • Enxalza a honestidade, a concordia, a busca de espazos de encontro e ou o ilimitado acatamento da lei que caracterizaron aos ponentes constitucionais e a transición democrática e apunta que “todas ou case todas as crises presentes ou recentes terían sido menos intensas se tales principios non tivesen sido relativizados ou, en ocasións, directamente ignorados”
  • Chama a atención sobre a “ameaza perigosa” das pseudociencias que “poñen en risco avances que custou décadas materializar”
  • Anima a seguir o exemplo dos Camiños de Santiago como ámbito de “interculturalidade e relación harmoniosa” para superar “o odio e a incomprensión que envelenan tantos espazos de convivencia”

 

Santiago, 30 de decembro de 2018.- O presidente do Parlamento de Galicia, Miguel Ángel Santalices Vieira, exerceu hoxe como delegado rexio na Ofrenda da Translación que cada 30 de decembro se celebra na Catedral de Santiago de Compostela.

Na súa invocación, Santalices Vieira fixo memoria das catro décadas transcorridas desde a aprobación da vixente Constitución española que trouxo consigo avances sociais e un estado de benestar “que estamos obrigados a coidar e a impulsar na medida das nosas diferentes posibilidades”.

Santalices desexou que “a prudencia e o acerto” acompañen ao Rei Felipe VI “ao servizo de España e do ben común, sempre no marco da vixente Carta Magna”.

Referíndose ao aniversario da Constitución, o presidente do Parlamento de Galicia  falou de “catro décadas de luces, apenas empañadas por algunhas sombras”.

Superar problemas históricos

Nun discurso bilingüe, o oferente recordou que “a Constitución do 78 resolveu boa parte dos problemas históricos que aquela España viña arrastrando, aínda que persistan outros como as dificultades económicas relacionadas coa última crise, o distanciamento fronte ás institucións e, sobre todo, o desafío secesionista, un quebrantamento democrático que sitúa ao noso país ante o maior reto das últimas décadas”.

Apelou o delegado rexio a cualidades como a honestidade, a solidariedade, a concordia, a empatía, a busca de espazos de encontro ou o ilimitado acatamento á lei, que caracterizaron o comportamento dos ponentes constitucionais e das persoas artífices da transición á democracia. “Todas ou case todas as crises presentes ou recentes terían sido menos intensas se tales principios non tivesen sido relativizados ou, en ocasións, directamente ignorados”, dixo.

A xuízo do presidente do Parlamento de Galicia, “España cambiou moito, e para mellor, nestas catro décadas”.  Produciuse un cambio de paradigma migratorio, convertendo ao país  nun “destino cobizado pola inmigración”.  Animou a ollar a inmigración como un fenómeno beneficioso no actual escenario de intensa crise demográfica, “pero inmigración ordenada –puntualizou-, que busque a integración e respecte a integridade territorial, o ordenamento xurídico e os dereitos e liberdades dos territorios de acollida”.

O delegado rexio recordou que os avances sociais van parellos a “novidades científicas antano inimaxinables”. Referiuse á anunciada creación de seres humanos modificados xeneticamente, ”rexeitada de plano pola comunidade científica que, afortunadamente, se rexe por sólidos principios éticos, que deben tutelar calquera innovación neste e outros campos fronteirizos”.

A ameaza das pseudociencias

Destacou  que avances científicos como os rexistrados no ámbito da inmunoloxía e a inmunoterapia “ofrecen á humanidade un vasto campo de aplicacións e teñen salvado, grazas ás vacinas, millóns de vidas en todo o mundo”.  Por iso, e fronte a esta realidade, “as pseudociencias supoñen unha ameaza perigosa para a saúde pública e poñen en risco avances que custou décadas materializar”.

Recordou neste sentido, o papel da galega Isabel Zendal, primeira enfermeira da historia en misión internacional e figura clave para o éxito da Expedición Filantrópica da Vacina que a comezos do século XIX estendeu a vacina contra a varíola en América e a mesmo a introduciu en Asia.

O exemplo do Camiño de Santiago

“Que o exemplo dos Camiños de Santiago, como espazos de interculturalidade e de relación harmoniosa entre persoas de diferentes sensibilidades, axude o mundo actual a atopar puntos de encontro, superar a indiferenza coa que ollamos o sufrimento do terceiro mundo e que o odio e a incomprensión que envelenan tantos espazos de convivencia abran paso a novos escenarios de diálogo, acercamento e mestizaxe, na procura do proveito mutuo”, afirmou o oferente.

Na invocación, Santalices lamentou a lacra da violencia no ámbito familiar e contra as mulleres, ao tempo que fixo referencia a outras dificultades como o desemprego, a desilusión ou os problemas  económicos. Avogou por edificar unha sociedade “máis solidaria e honesta, sempre predisposta na defensa da dignidade das persoas”.

Para a mocidade, o delegado rexio reclamou “as oportunidades económicas e profesionais que merece  para desenvolver o seu proxecto vital desde o que sentar as bases dun mundo mellor”.

O presidente do Parlamento lembrou tamén ás “persoas enfermas, as que padecen o azoute das adiccións ou as que atravesan transos amargos nas súas vidas”. Lembrou, “con especial afecto”, ás familias dos mariñeiros dos barcos afundidos recentemente fronte á  costa galega.  Desexou “que nunca falte unha man amiga, unha palabra de ánimo nin un sorriso agarimoso”.

Para o vindeiro Xacobeo 2021, o oferente fixo votos para que os traballos preparatorios deste acontecemento “conduzan a unha celebración proveitosa na que, como sucedeu ao longo da historia, todas as inquedanzas –relixiosas e laicas, culturais ou de simple lecer- teñan acubillo, desde a seguridade de que a peregrinación enriquece a todos no máis profundo do seu ser”.

Santalices Vieira rematou a súa invocación cun extracto do final do discurso Alba de Gloria, pronunciado por Castelao en Buenos Aires o 25 de xullo de 1948: “Que a fogueira do esprito siga quentando as vosas vidas e que a fogueira do lume nunca deixe de quentar os vosos fogares”.

IMG_5321

VI Premio Internacional APECSA 2018 de divulgación do Camiño de Santiago, concedido ao Parlamento pola Asociación de Periodistas e Estudosos do Camiño de Santiago

2X5A9473O titular do Lexislativo galego, Miguel Ángel Santalices Vieira, recolleu este mediodía o VI Premio Internacional APECSA 2018 de divulgación do Camiño de Santiago, outorgado ao Parlamento de Galicia pola Asociación de Periodistas e Estudosos do Camiño de Santiago pola contribución do Lexislativo á celebración do Xacobeo 93, acontecemento que marcou un punto de inflexión na revalorización das diferentes vías de peregrinación e como factor de dinamización económica social e cultural.

No acto, celebrado no compostelán Museo das Peregrinacións, o presidente do Parlamento quixo compartir o recoñecemento con “todos os que desde diferentes responsabilidades contribuíron a engrandecer os camiños de Santiago e a súa meta”. Destacou, nesta tarefa, o papel protagonista dos xornalistas e estudosos do Camiño de Santiago, “sen os que resultaría imposible ter acadado a enorme difusión deste fenómeno”.

Apuntou Santalices que “igual que fixeran con anterioridade os pais da Constitución e todos os que fixeron posible a exitosa transición política española, os grupos políticos representados na Cámara galega deron exemplo de  diálogo e de concordia, de man tendida e de amplitude de miras para facer do Plan Xacobeo un asunto de país que transcendía os intereses particulares ou partidistas”, razón pola que fixo extensivo o premio ás deputadas e deputados que integraban a Cámara en 1991.

“Daquela –agregou-, o Parlamento de Galicia asumiu e enriqueceu coas súas achegas un plan que era froito do traballo de moitas persoas, entre as que quero destacar dous nomes: Xerardo Fernández Albor, fundador do Intergrupo do Parlamento Europeo sobre o Camiño de Santiago e promotor incansable da realidade xacobea; e Manuel Fraga que, desde a Presidencia da Xunta, foi quen de converter o Xacobeo  no que hoxe é, un acontecemento de dimensión universal”.

Apuntou o presidente da Cámara que este premio supón tamén “un acicate de cara aos retos que a institución parlamentaria ten ante si”. Retos como o de seguir achegando a institución á cidadanía para “que nos vexan como solucionadores de problemas, e lugar de ollarnos como parte do problema”; como a necesidade de acadar acordos; ou como a posibilidade de que a totalidade da Cámara poda apoiar o Xacobeo 2021, “un proxecto que a cidadanía xa ten interiorizado como necesario e como propio”.

Para Santalices, o vindeiro Xacobeo abre un abano de posibilidades como “fonte de riqueza, de emprego, de creatividade, de cultura e de proxección exterior dunha dimensión nunca antes coñecida, malia as exitosas experiencias do noso pasado recente”.

Entregados no Parlamento os XXV Premios de publicidade en galego

2X5A8191O presidente do Parlamento de Galicia, Miguel Santalices Vieira; o secretario xeral de Política Lingüística da Xunta, Valentín García Gómez,  e o presidente do Foro Enrique Peinador, Xosé González Martínez, entregaron está mañá, na Cámara galega, os XXV Premios de Publicidade en galego convocados conxuntamente polas tres entidades.

Na categoría de televisión, o premio deste ano recaeu no anuncio “Tarxeta PassVigo”, encargado por Viguesa de Transportes-VITRASA  á axencia Ecovigo Publicidad, S.L.

As campañas de dinamización comercial 2017 impulsadas pola Asociación Compostela Monumental, da axencia Fancylooks, resultaron gañadoras na categoría de radio.

A disolución do Consello Asesor da Radio Televisión Española en Galicia –órgano que puxo en marcha os galardóns que hoxe se entregaron- animou á Secretaría Xeral de Política Lingüística, o Parlamento de Galicia e o Foro Enrique Peinador a asumir directamente a convocatoria dos Premios de Publicidade en Galego, “desde o convencemento de que o galego é un idioma acaído para a realización de campañas publicitarias de éxito”, en palabras de Santalices.

Santalices subliñou tamén a capacidade das empresas galardoadas para facer chegar as súas mensaxes a un elevado volume de destinatarios.

A entrega dos Premios de Publicidade en Galego tivo lugar na Sala Carballo Calero da Biblioteca do Parlamento, “símbolo de galeguidade”, en palabras de Santalices, que agregou que malia tratarse dun acto  sinxelo, este leva aparellada unha profunda carga simbólica.

O Parlamento de Galicia acolle un acto institucional conmemorativo do Día Internacional e Europeo das Persoas con Discapacidade

“É a partir da Constitución do 78 cando toma impulso definitivo o que hoxe coñecemos como o Estado de benestar, ao tempo que se foi articulando un sistema de dereitos e garantías legais que protexe as persoas con discapacidade, sexa esta de tipo físico ou intelectual”. Así o manifestou esta mañá o presidente do Parlamento de Galicia, Miguel Ángel Santalices Vieira, nun acto institucional organizado na Cámara galega co gallo do Día Internacional e Europeo das Persoas con Discapacidade  que se celebra cada 3 de decembro.

Santalices afirmou que a elección do Pazo do Hórreo como escenario para este acto conmemorativo afianza o papel do Parlamento, “a casa de todas as galegas e galegos, e de maneira especial das persoas máis necesitadas do amparo, do apoio e do alento das institucións públicas”.

Admitiu o presidente do Parlamento que o sistema de protección das persoas con discapacidade debe seguir avanzando de cara a superar os atrancos que aínda persisten.

“A predisposición do Parlamento de Galicia en materia de discapacidade  é absoluta”, afirmou Santalices Vieira antes de recordar a existencia dunha comisión non permanente de discapacidade, as medidas da administración parlamentaria en materia de integración de persoas con discapacidade; ou os acordos para canalizar a interlocución do Parlamento coas diferentes organizacións que traballan no ámbito da discapacidade.

O presidente do Parlamento anunciou tamén a próxima convocatoria dunha bolsa de formación orientada a persoas con discapacidade física, así como a elaboración dos proxectos técnicos orientados á supresión de barreiras arquitectónicas e a mellora da accesibilidade do edificio que alberga o Lexislativo galego.

Referiuse tamén ás diferentes  posibilidades de participación cidadá habilitadas polo Parlamento de Galicia e recordou que a última delas, a posta en servizo dunha sede electrónica, converte ao Parlamento de Galicia no primeiro de España en ofrecer un servizos destas características.

No acto tomaron tamén a palabra a conselleira de Política Social da Xunta, Fabiola García, e o presidente do Comité de Representantes de Persoas con Discapacidade de Galicia (CERMI Galicia), Iker Sertucha.DSC_0035