Archivo de la categoría: Sin categoría

O presidente do Parlamento de Galicia inaugurou en Pontevedra o XVIII Curso Complementario de Comunicación e Protocolo

-O5A0626O presidente do Parlamento de Galicia asegurou esta mañá que “malia as dificultades ás que se enfrontan os medios de comunicación, existe un consenso xeneralizado que apunta ao xornalismo de calidade como único antídoto capaz de contrarrestar os afectos nocivos da desinformación que campa ás súas anchas por Internet”.

Santalices Vieira pronunciou esta mañá a conferencia inaugural do XVIII Curso Complementario de Comunicación e Protocolo e das VII Xornadas de Comunicación Institucional e Imaxe Pública que se celebran na Facultade de Ciencias Sociais e da Comunicación de Pontevedra.

Reivindicou o presidente da Cámara galega o “papel transcendental  dos xornalistas e dos medios de comunicación nas democracias avanzadas como a nosa”.

Na mesma liña, o titular do Lexislativo galego recordou que o Regulamento da Cámara outorga un papel “determinante” aos xornalistas acreditados, ata o punto de que nin deputados nin público poden tomar fotografías das sesións.

Por iso, Santalices apuntou que “se queremos e aspiramos a dignificar o labor dos parlamentarios, coido que é bo respectar as normas. Que os xornalistas fagan o seu traballo e os deputados e deputadas exerzan o seu labor. Foron elixidos nas urnas para exercer unha alta responsabilidade, a de representar ás galegas e galegos no poder lexislativo, non para que dediquen o seu tempo a tuitear desde o escano, porque iso poden facelo noutro momento”.

O conferenciante admitiu ter a “impresión persoal” de que en ocasións, desde a tribuna de oradores do Hemiciclo “se coida tanto ou máis a imaxe, a posta en escena na procura dunha foto, dun plano pensando na televisión ou nos vídeos de Internet, que a oratoria e a calidade do discurso”.

Con todo, Santalices insistiu en que “política e comunicación son dúas realidades indisociables, máis nos nosos días”, e apostou pola “comunicación no sentido máis amplo, contando cos novos medios e coas novas demandas sociais”. Apostou por unha relación bidireccional, porque “aquel vello esquema no que a cidadanía contemplaba a vida pública como espectadora pasou á historia”.  “Quen non vexa esta realidade ou se negue a aceptala ten ou terá serios problemas”, aseverou.

Recordou Santalices Viera que para avanzar nesa dirección, se aprobou en 2015 a Lei de iniciativa popular e participación cidadá no Parlamento de Galicia, que contempla diferentes posibilidades para que galegas e galegos teñan un papel proactivo no Lexislativo autonómico.

Entre as cualidades, que  ao seu xuízo, deben reunir deputadas e deputados, o presidente do Parlamento enumerou as seguintes: saber comunicar, capacidade para conectar coa xente, entender os problemas e procurar solucións; dispoñibilidade (“un deputado non é un empregado que traballa de oito a catro”); coherencia, honestidade, credibilidade, proactividade; visión de futuro e capacidade de anticipación.

“Mudaron as formas, pero a esencia permanece. A política feita polas persoas e para as persoas, dentro dun marco normativo aceptado e respectado por todos. Nada hai inamovible, nin sequera as leis. Pero principios como a orde, a cortesía e o respecto, esencias do protocolo aos que moitos de vostedes se dedican, deberán prevalecer sempre que aspiremos a seguir vivindo en democracia, ao amparo da lei e do Estado de Dereito”, afirmou o presidente da Cámara galega.

Santalices concluíu o seu relatorio convidando aos participantes a analizar se o protocolo actual contempla para deputadas e deputados un tratamento acorde coa representación democrática e institucional que as urnas lles outorgan.

Durante a súa intervención Santalices Vieira compartiu tamén datos referidos á historia do Parlamento e aos cambios rexistrados ao longo dos 36 anos transcorridos desde a sesión constitutiva da Cámara, que tivo lugar o 19 de decembro e 1981 no Pazo de Xelmírez, cedido polo Arcebispado de Santiago de Compostela.

Anuncios

O Parlamento súmase a celebración do Día do Pobo Xitano e fai un chamamento a prol da integración

O Parlamento de Galicia acolleu esta tarde un acto institucional enmarcado na conmemoración do Día Internacional do Pobo Xitano, que se celebra o 8 de abril de cada ano para facer visible a realidade e os problemas da que é considerada a maior minoría étnica de Europa.

IMG_2945O presidente do Parlamento, Miguel Ángel Santalices Vieira, recibiu a unha delegación da Fundación Secretariado Xitano. No transcurso do encontro proxectouse o vídeo Partir de Cero, unha iniciativa encamiñada a poñer de manifesto a discriminación e o rexeitamento que padecen xitanas e xitanos.

O presidente do Lexislativo galego expresou, facéndose eco do sentir dos 75 deputados e deputadas da Cámara, o “desexo da plena integración e do benestar do pobo xitano”.

Santalices Vieira felicitou á Fundación Secretariado Xitano polo traballo que está a desenvolver no ámbito da integración e amosouse convencido de que, malia os obstáculos aos que se enfrontan estas persoas, “non todas as portas están pechadas”, como se conclúe logo de ver o vídeo proxectado no acto.

Subliñou o titular do Lexislativo galego que “a mellor ferramenta para acadar a plena integración en todos os ámbitos pasa pola educación e pola formación”.

Por iso, Santalices instou ás familias xitanas a esforzarse por fidelizar e mellorar o rendemento académico dos máis novos porque “nin o abandono nin o fracaso escolar admiten desculpas”.

O presidente da Cámara animou tamén aos integrantes da comunidade xitana a enviar as súas propostas ao Parlamento. “Serán para nós un estímulo”, dixo.

O acto contou tamén coa intervención da directora territorial da Fundación Secretariado Xitano-Galicia, Eva Vera Ledo; e do director xeral de Inclusión da Consellería de Política Social da Xunta, Arturo Parrado Puente. Asistiron representantes dos grupos parlamentarios e do Valedor do Pobo.

Comparto, por se a alguén pode interesar, a miña intervención no acto de entrega das Medallas do Parlamento de Galicia a Aldeas Infantiles SOS Galicia, Cáritas Diocesanas de Galicia e COGAMI: https://goo.gl/73qrX8. Grazas a todas as entidades galardoadas polo labor que desenvolven a prol dos máis necesitados.

Xantar-coloquio organizado polo Club Financeiro da Coruña

20180129_santalices_financiero_009O presidente do Parlamento de Galicia, Miguel Ángel Santalices Vieira, participou hoxe, como convidado, nun xantar-coloquio organizado polo Club Financeiro da Coruña, onde explicou o funcionamento do Lexislativo galego e animou aos seus interlocutores a coñecer e a utilizar as diferentes ferramentas de participación cidadá habilitadas pola Cámara.

Apuntou, como exemplo, que o Parlamento de Galicia é unha das Cámaras que ofrece maiores facilidades para a presentación de proposicións de lei de iniciativa popular. Arestora, logo da reforma normativa acometida en 2015, abonda con que estas proposicións de lei conten co respaldo de 10.000 sinaturas, mentres que anteriormente se requirían 15.000 rúbricas.

Ao longo da súa historia, o Parlamento de Galicia leva aprobadas un total de  7 leis de iniciativa popular. A última delas foi a Lei 7/2017, de 14 de decembro, de medidas de eficiencia enerxética e garantía de accesibilidade á enerxía eléctrica.

A nova lei Lei de iniciativa lexislativa popular  e participación cidadá introduciu novas modalidades de participación no Parlamento, como as proposicións non de lei de iniciativa popular, que precisan do respaldo de 2.500 sinaturas. Desde 2015 rexistráronse no Parlamento de Galicia 7 proposicións non de lei de iniciativa popular, aínda que non todas foron asumidas e aprobadas. Das aprobadas, destacan a PNL de iniciativa popular sobre redución do tipo impositivo do IVE dos cueiros e, máis recentemente, unha PNL que demanda que a Filosofía sexa materia troncal no Bacharelato. As dúas foron aprobadas por unanimidade.

O Parlamento de Galicia tamén facilita que a cidadanía poda efectuar, a través da web, propostas ou suxestións referidas aos diferentes proxectos lexislativos en fase de tramitación; abre a porta á participación popular no control ao Goberno, mediante propostas de preguntas que posteriormente poderá asumir un grupo parlamentario; e canaliza o exercicio do dereito de petición ante o Parlamento por parte de calquera cidadán ou cidadá.

No encontro de hoxe cos socios do Club Financiero Atlántico, o presidente do Parlamento de Galicia reiterou a vocación de apertura da institución ao conxunto da sociedade, apertura que, ao seu xuízo debe canalizarse mediante unha maior presenza da cidadanía no propio Pazo do Hórreo, e tamén a través de iniciativas como a de hoxe, co desprazamento de representantes da Cámara alí onde se lles convida para dar a coñecer o seu labor e tomar nota das suxestións que lles podan efectuar.

Neste sentido, Santalices Vieira considerou esencial o papel do empresariado e convidounos a achegarse ao Parlamento, tanto para coñecer mellor o traballo da institución, como na procura de solucións que podan contribuír ao crecemento da economía galega.

“O mecanismo está aí e nós imos seguir tratando de implantalo. Abrir o Parlamento significa estar onde está a sociedade e que a xente poda formular as súas propostas”, afirmou o presidente da Cámara en declaración aos xornalistas unha vez rematado o encontro.

Santalices apuntou que no coloquio xurdiu tamén unha proposta que el defende desde hai tempo e que propón incorporar o termalismo terapéutico á carteira de servizos do Sistema Nacional de Saúde.

No coloquio, o titular do Parlamento de Galicia foi presentado polo presidente do Club Financiero Atlántico, Mariano Gómez-Ulla

O presidente do Parlamento rende homenaxe a Domingo Fontán

Foto de grupo ponentes e parte dos asistentesO presidente do Parlamento de Galicia, Miguel Ángel Santalices Vieira, clausurou este mediodía en Porta do Conde (Portas) a xornada divulgativa “Domingo Fontán e a evolución da cartografía”, organizada pola Cámara galega coa colaboración do Concello de Portas e  Asociación Domingo Fontán coincidindo co 200 aniversario do comezo dos traballos de elaboración da Carta Xeométrica de Galicia, o primeiro mapa científico do país.

Na súa intervención o presidente do Parlamento afirmou que esta xornada pretende render homenaxe e enxalzar a personalidade e o traballo de Domingo Fontán, un “cintífico pioneiro” en moitos ámbitos; inxustamente tratado no seu tempo e esquecido despois da súa morte, malia que o seu principal traballo –a denominada Carta Xeométrica de Galicia– que comezou a elaborar en 1817- fose unha iniciativa absolutamente novidosa e que seguiu sendo útil ata ben entrado o século XX.

A xornada enmárcase nun acordo do pasado mes de abril no que a Cámara  instaba a difundir a vida e obra de Fontán ao cumprirse o segundo centenario  do inicio da Carta Xeométrica.  Celebrouse na localidade natal do científico homenaxeado porque, segundo explicou Santalices, o Parlamento debe saír do Pazo do Hórreo, “estar entre a xente, non ser herméticos, e así o estamos facendo”.

O titular do Parlamento destacou a personalidade polífacética de Fontán, un “adiantado ao seu tempo, tamén en materia pedagóxica”. Fontán, posuidor de coñecementos enciclopédicos, foi un dos primeiros catedráticos da Universidade de Santiago que deixou de empregar o latín nas súas clases na procura dun maior rendemento académico dos seus discípulos.

O presidente do Parlamento animou a superar a “lenda negra” que incide nas “dsgrazas” e feitos positivos, e frea o recoñecemento que merecen personalidades como Domingo Fontán.

Galicia ocupou tamén boa parte do quefacer de Fontán como deputado a Cortes en tres etapas diferentes.

O presidente do Parlamento adiantou que  a Cámara galega ten intención de recompilar nun libro electrónico as intervencións dos expertos que participaron na xornada celebrada hoxe en Porta do Conde coa intención de preservar e divulgar o contido das mesmas.

“Domingo Fontán, aproximación á súa figura” foi o título da primeira mesa redonda desta xornada e contou participación  da vicedecana da Facultade de Xeografía e Historia da USC, Margarita Barral; a decana da Facultade de Matemáticas da USC, María Elena Vázquez; e o catedrático de Lingua e Literatura do IES As Lagoas de Ourense, Alfonso Vázquez Monxardín.  Foi moderada polo alcalde de Portas, Víctor Estévez.

A segunda das mesas redondas do programa versou sobre “Cartografía en Galicia, onte e hoxe. De percorrer Galicia a pé a comezos do século XIX á cartografía por satélite”. Estivo moderada pola vicepresidenta da Asociación Domingo Fontán, Mª Rebeca López; e contou coa participación da directora do Instituto de Estudos do Territorio, Inés Santé; o decano da Facultade de Xeografía e Historia da USC, Francisco Ramón Durán; e o experto en cartografía, doutor en Xeografía e profesor da Escola de Enxeñería de Minas e Enerxía da Universidade de Vigo, Gonzalo Méndez.

Na clausura da xornada participaron a presidenta da Asociación Domingo Fontán, Concha Méndez; o alcalde de Portas, Víctor Estévez; e o secretario xeral de Cultura da Xunta, Anxo Lorenzo. O presidente do Parlamento de Galicia, Miguel Ángel Santalices Vieira, foi o encargado de pechar a actividade.

Un novo premio recoñece hoxe a ilimitada creatividade das e dos artistas galegos. Un pracer felicitar a Ángela de la Cruz polo Premio Nacional de Artes Plásticas 2017. Parabéns!